برر قاز و ايكيشر طاووق و هر آدمه ايكيشر شرعى بطمان ايله دقيق و برر بيوك كاسه پرنج و برر دانه ايچى حلوا ايله طولمش كليچه و برر ظرف عسل و سير و پياز و سركه و طوز و ختايده اولان ملون تره‌لر و ايكى بارداق و برطبق نقل و بر قاچ حسن و جمال صاحبى جست و چالاك خدمتكار كه اخشامدن صباحه و صباحدن اخشامه دكين اياق اوزرنده طوروب بر لحظه غائب اولمازلردى ، تعيين ايلديلر . ايرتسى كه ذى الحجه بك طقوزيدر سحنين ثلث اخيره‌ده كلوب ايلچيلرى بيدار و پادشاهك ضيافتى اولديغنى اخبار ايلدى سحنين ايلچيلرك ياننه سراى پادشاهى و سائر يرلرده امورلرينى كورمك ايچون تعيين اولنان كيمسه لر دركه ديار خراسانده سقاول تعبير ايدرلر . ايلچيلرى اكرلنمش آتلره بنديروب پادشاه سراينه كتورديلر . و اولكى ميدانده اجلاس ايتديلر . اولوقتده اوچيوز بيك مقدارى آدم جمع اولمشيدى . صباح اولديغى كبى سابقا ذكر اولنان اوچ قاپو آچيلوب ايلچيلرى پادشاهه مظلوملرك بولشديغى تختك اوكنه كتورديلر . و بش دفعه باشلرينى زمينه قودرديلر . پادشاه تختدن اينوب ايلچيلرى طشره‌يه چيقارديلر . و بو كون ضيافت اولمغله كندولر كزى قضاء حاجته محتاج ايتمامك ايچون تخفيف ايديكز زيرا صكره طشره‌يه چقلمق ممكن دكلدر ديو آكاه ايتملريله ايلچيلردن بر كروه طشره‌يه